გამოცდის შესახებ - მართვის მოწმობის გამოცდა, B კატეგორია | "პრავის" გამოცდა

B კატეგორიის გამოცდის შესახებ

  • ყველა ინფორმაცია ერთ გვერდზე
  • რჩევები 8-წლიანი გამოცდილებისა და ინტელექტუალურად მწიფე ჯგუფისგან
ticket page

რა უნდა იცოდეთ აუცილებლად?

  • გამოცდაზე დაიშვებიან 17 წლის ასაკიდან
  • საჭიროა წინასწარი რეგისტრაცია
  • დიდი მოთხოვნის გამო უახლოესი დღეები უკვე სულ შეივსო
  • ჯერ თეორიას აბარებთ, შემდეგ კი პრაქტიკას
  • თეორიის შედეგი რომ არ გაუქმდეს, საჭიროა 30 დღის პერიოდში პრაქტიკული ბარიერიც გადალახოთ
  • პრაქტიკაზე ცოცხალი რიგია და წინასწარი რეგისტრაცია არ ხდება

რეგისტრაცია

თუ არ დარეგისტრირდებით, სხვანაირად გამოცდაზე ვერ გახვალთ. რაც მალე, მით უკეთესი - რადგანაც დიდი მოთხოვნაა და ისედაც 20-30 დღის მერე მოგიწევთ ჩაწერა.

სწავლის დაწყებამდე სჯობს გამოცდაზე ადგილი უკვე დაკავებული გქონდეთ. სწავლას კი - 15-20 დღეში გპირდებით, რომ აუცილებლად მოვასწრებთ.

რეგისტრაციის გზები

ამის გაკეთება ორნაირად შეიძლება:

სწრაფი გადახდის აპარატებით: თბს ფეი, ლიბერთი ფეი და ექსპრეს ფეის აპარატი. აირჩიეთ სახელწმიფო სერვისები, მართვის მოწმობის გამოცდა. შემდეგ შეარჩიეთ თარიღი, დრო, შეიყვანეთ პირადი ინფორმაცია და გადაიხადეთ გამოცდის ღირებულება, რის შემდეგაც მიიღებთ დამადასტურებელ SMS-ს.

ან ონლაინ ეწვიეთ ვებ-გვერდებს:

გამოცდის შინაარსი:

თეორია

თეორიული გამოცდის ჩაბარება ადასტურებს, რომ თქვენ კარგად იცნობთ საგზაო მოძრაობის შესახებ კოდექსს.

30-წუთიან გამოცდაზე მიუჯდებით სენსორულ კომპიუტერს, სადაც 30 შეკითხვა მოგივათ. გაქვთ მაქსიმუმ 3 შეცდომის დაშვების უფლება.

პრავის გამოცდა შიგნიდან მართვის მოწმობა პრავის გამოცდა საგამოცდო ოთახი

შეკითხვები მოვა იმ 1083 ბილეთიდან, რომელიც უკვე გამოქვეყნებულია საჯაროდ და ყველასთვის კარგადაა ნაცნობი.

დასამშვიდებლად გეტყვით, რომ კოდექსის შესწავლა არც ისეთი რთულია. გამოცდას ჩვენი მოსწავლეთა 95% პირველივე ცდაზე აბარებს.

ბილეთები იხილეთ აქ: ბილეთების გვერდი

პრაქტიკა

თქვენი ნებაა მექანიკაზე ჩააბარებთ თუ ავტომატიკაზე.

თეორიის ჩაბარების შემდეგ დგებით ცოცხალ რიგში, ხოლო მას შემდეგ, რაც დაიკავებთ თქვენს ადგილს ავტომობილის კაბინაში, ნუ გაგაკვირვებთ თქვენს გვერდზე მჯდომი გამომცდელის სიჩუმე. თქვენ მხოლოდ კომპიუტერთან უნდა "იკონტაქტოთ".

პრავის გამოცდა მართვის მოწმობის გამოცდის კომპიუტერული პროგრამა

სულ ჯამში უკვე კარგად ნაცნობი 6 ელემენტის შესრულება იქნება საჭირო. ესენია: უკუსვლით პარკირება, ზიგზაგი, მიმართულების შეცვლა (ჩიხი), რვიანი, აღმართი და პარალელური პარკირება.

რუსთავის საგამოცდო მოედანი

გამოცდას 100 ქულით იწყებთ და მინიმუმ 61 ქულით უნდა დაასრულოთ.

ეს არც ისე ძნელია. ჩვენი მოსწავლეთა 67%, რომელიც გადის 5 გაკვეთილს გამოცდას პირველივე ცდაზე აბარებს.

ქულების შესახებ დეტალურად იხილეთ აქ: ქულების სისტემა

ყველა ქალაქში განსხვავდება მოედნის ფართობი და მათზე ელემენტების განლაგება და თანმიმდევრობაც.

ქალაქ რუსთავსა და გორში საგამოცდოდ იყენებენ Skoda Rapid-ის ტიპის ავტომობილებს, სხვა ქალაქებში კი Skoda Fabia-ს.

შკოდა რაპიდი

საგამოცდო შკოდა რაპიდები

შკოდა ფაბია

საგამოცდო შკოდა ფაბიები

თბილისთან უახლოესი საგამოცდო ცენტრი მდებარეობს რუსთავის გზატკეცილზე.

სამუშაო საათები ასეთია:
    • ორშაბათი-პარასკევი: 09:30 - 17:00
    • შაბათი: 09:30 - 16:00
    • კვირა: დასვენება

თეორიული გამოცდის ღირებულებას იხდით წინასწარ, რის შემდეგაც იღებთ SMS შეტყობინებას, რომლის წარდგენა აუცილებელია გამოცდაზე დასაშვებად.

    • თეორიული გამოცდის ღირებულება - 56 ლარს შეადგენს.
    • ფასდაკლებას იღებენ არასრულწლოვნები და სტუდენტები - ისინი 16 ლარს იხდიან.

სტუდენტური ფასდაკლების მიღება შესაძლებელია მხოლოდ ID ბარათით (პირადობა) - ზედ სტუდენტის სტატუსით. გაითვალისწინეთ, რომ სტუდენტური ცნობა, სტუდბილეთი - არ გამოდგება.

თეორიული გამოცდის ჩაბარების დღიდან - გეძლევათ 30 დღე იმისათვის, რათა ჩააბაროთ პრაქტიკული გამოცდაც. პრაქტიკის გამოცდის საფასურზე ოდნავ ქვევით მოგითხრობთ... ☆

    • SMS (შეტყობინებას იღებთ ონლაინ რეგისტრაციის დასრულებისთანავე) (აღარ არის აუცილებელი, მაგრამ სასურველია შეინახოთ);
    • ჯანმრთელობის მდგომარეობის შესახებ ცნობა (იგივე "ფსიქო", იგივე ფორმა IV 100/ა);
    • პირადობის მოწმობა ან პასპორტი.

არასრულწლოვანმა დამატებით უნდა იქონიოს:

    • დაბადების მოწმობის დედანი (ან ასლი ნოტარიულად დამოწმებული);
    • მშობელი (ან მშობლის თანხმობა ნოტარიულად დამოწმებული);
    • საჯარო სკოლის მოწმობა ან ავტოსკოლის მოწმობა;

საჯარო სკოლის მოწმობა გაიცემა მოთხოვნიდან მყისიერად თავად სკოლის მიერ იმ შემთხვევაში, თუ მოსწავლემ წარმატებით დახურა მე-11 კლასი და გაიარა საგანი საგზაო მოძრაობის შესახებ.
ავტოსკოლის მოწმობა გაიცემა მოთხოვნიდან 10-დღის ვადაში. მოთხოვნა უნდა დაფიქსირდეს მოსწავლის მიერ. მოწმობის საფასური 20 ლარს შეადგენს.

ზოგადად, ეს ფრაზა დაივიწყეთ! ამის შესახებ არაფერს მოგიყვებით...

კარგით, 2 სიტყვით: თეორიაზე ჩაჭრის შემთხვევაში, განმეორებით გამოცდაზე დაიშვებით 7 დღის შემდეგ, საფასურის თავიდან გადახდის შემთხვევაში (40 ₾).

აგრეთვე - შენი ავტოსკოლის გარანტია 3 თვის განმავლობაში გრძელდება. ამ პერიოდში თეორიული კურსის ხელახლა გავლისთვის მხოლოდ 15 ლარის გადახდა მოგიწევს. დაფინანსებული კურსით სარგებლობა არაერთგზის შეგიძლია.

პრაქტიკის შესახებ ქვევით მოგითხრობთ..

თეორიული გამოცდის ჩაბარების დღიდან გაქვთ 30 დღე, რათა გადალახოთ პრაქტიკული ბარიერიც.

გადახდის პრინციპი და მცირე დეტალები განსხვავდება იმის მიხედვით, გამოცდას მექანიკური ტიპის საშუალებაზე აბარებთ თუ ავტომატიკურზე.

მექანიკური ტიპის მანქანაზე გამოცდის ჩაბარების შემთხვევაში, უფლება გეძლევათ მართოთ როგორც მექანიკური, ასევე ავტომატიკური მსუბუქი ავტომობილი. თუმცა, ავტომატიკური ტიპის მანქანაზე ჩაბარების შემთხვევაში, თქვენი უფლებები იზღუდება და მხოლოდ ავტომატიკის მართვა შეგეძლებათ. ასეთ დროს, რა თქმა უნდა, მომავალში გამოცდის გადაბარებაც შესაძლებელია და მხოლოდ პრაქტიკული ნაწილის ჩაბარებას მოითხოვს.

6-თვიანი საერთაშორისო მართვის მოწმობის აღება მხოლოდ მექანიკური გადაცემათა კოლოფის მართვის უფლების მქონეს შეუძლია.

მექანიკის გამოცდის შემთხვევაში თქვენ გაქვთ 5 უფასო ცდის უფლება, ოღონდ მისი გამოყენება მხოლოდ 7-დღეში ერთხელ შეგიძლიათ. აგრეთვე, დამატებით გაქვთ 26 ფასიანი ცდის უფლებაც - ყოველდღიურად, დღეში ერთხელ.

თითო ფასიანი ცდის ღირებულება 30 ლარია.

მოვიყვანოთ მაგალითი:
ელენემ შაბათს ჩააბარა თეორიული გამოცდა და იმავე დღეს გადის პრაქტიკის 1-ლ უფასო ცდაზეც. თუ ელენე ვერ ჩააბარებს პირველივე მცდელობით პრაქტიკას, მას იმ დღესვე მიეცემა კიდევ 1 მცდელობის უფლება - ოღონდ ფასიანის.

შემდეგი უფასო ცდის უფლება მას ზუსტად 7 დღის შემდეგ - კვლავ შაბათს ექნება. თუმცა, იქამდე მას ყოველ სამუშაო დღეს მიეცემა თითო ფასიანი ცდის გამოყენების უფლება. ასე იქნება 30 დღის განმავლობაში...

ეს ისე, ცნობისთვის, თორემ - ღმერთმა დაგვიფაროს ამდენი წვალებისგან..

შაბ კვ ორშ სამშ ოთხ ხუთ პარ შაბ
0₾
30₾

ავტომატიკის გამოცდის ღირებულება 40 ლარს შეადგენს და ამ ტარიფით სარგებლობა შეგიძლიათ მაქსიმუმ 5-ჯერ და ისიც 7-დღეში ერთხელ. აგრეთვე, დამატებით გაქვთ 26 ცდის უფლებაც - ყოველდღიურად, დღეში ერთხელ, რომლის ღირებულებაც 70 ლარია.

მოვიყვანოთ მაგალითი:
ლუკამ შაბათს ჩააბარა თეორიული გამოცდა და იმავე დღეს გადის პრაქტიკის 1-ლ 40-ლარიან ცდაზე. თუ ლუკა ვერ ჩააბარებს პირველივე მცდელობით პრაქტიკას, მას იმ დღესვე მიეცემა კიდევ 1 მცდელობის უფლება - ოღონდ მოუწევს დამატებით 70 ლარის გადახდა.

შემდეგი 40-ლარიანი ცდის უფლება მას ზუსტად შვიდი დღის შემდეგ - კვლავ შაბათს ექნება. აგრეთვე - ყოველ სამუშაო დღეს მიეცემა თითო 70-ლარიანი ცდის გამოყენების უფლებაც. ასე იქნება 30 დღის განმავლობაში...

ვიმეორებ: ეს ისე, ცნობისთვის, თორემ - ღმერთმა დაგვიფაროს ამდენი წვალებისგან..

შაბ კვ ორშ სამშ ოთხ ხუთ პარ შაბ
40₾
70₾
  • მაქსიმალური მასა:

    3 500 კგ.

  • მზგავრები:

    8 მძღოლის გარდა

  • გაიცემა:

    17 წლიდან

  • ვადა:

    უვადო

  • მისაბმელი:

    შესაძლებელია

  • ქვეკატეგორია:

    კვადროციკლი და ტრიციკლი (B1)

დისკუსიაში მონაწილეობის მისაღებად ავტორიზაცია

იხილეთ კომენტარები

you

2021-03-27 12:16:30

ზუკა ნემსაძე

ki

like

0

dislike

1

you

2021-03-27 15:42:18

ირაკლი ძიძიგური

უახლოესი ადგილები სრულიად დაკავებულია, სამწუხაროდ, თუმცა მე სწავლას უკვე ვიწყებ

like

1

dislike

0

you

2021-03-27 15:51:46

John Doe

უდიდესი მადლობა!

like

1

dislike

0

you

2021-03-29 20:02:26

დიანა ასლანიშვილი

ხომ ვერ მეტყვით პრაქტიკაზეწ ვისთან ჩავეწერო

like

1

dislike

0