სტატიაში გაგაცნობთ თბილისის მერიის მიზანს, ასევე უკვე განხორციელებულ და დაგეგმილ სამუშაოებს მეტროში და ინფრასტრუქტურულად შეცვლილ ჭავჭავაძის გამზირს.

 

მოცემულობა & მიზანი

რამდენიმე ხნის წინ, მერიის თანამშრომელმა გადაცემაში „საქმის კურსი“ განაცხადა, რომ თბილისში სამუშაო დღეებში 450 000 მანქანა, შაბათს 400 000, კვირას კი - 350 000 მანქანა გადაადგილდება.

ყველას მოგვეხსენება, რაოდენ კომფორტულია თბილისში კვირა დღეს მგზავრობა. აქედან გამომდინარე, მერიაში გადაწყვიტეს, რომ შეიმუშავონ პროგრამა, რომელიც 450 000-იან რიცხვს სამუშაო დღეებში დაიყვანს 350 000-იან ნიშნულზე.

ჩნდება კითხვა: როგორ მოვახერხოთ პირადი ავტომობილების შემცირება ქუჩებში? რა უნდა შევცვალოთ ამისთვის?  რა თქმა უნდა, გავაუმჯობესოთ საზოგადოებრივი ტრანსპორტის ქსელი და კომფორტი, რომელიც ჩვენს თანაქალაქელებს მისცემს საშუალებას მანქანებზე თქვან უარი და დატოვონ ავტოფარეხებში.  

საზოგადოებრივი ტრანსპორტის დაგეგმარების წინაშე დგება შემდეგი გამოწვევები:

  • საცობებიდან თავის არიდება და სისწრაფე
  •  ხშირი მიმოსვლა
  •  კომფორტული მგზავრობა.

 

მეტრო

პირველი ადგილი, სადაც ამ მხრივ უკვე გადაიდგა ნაბიჯები, ეს არის მეტრო. კერძოდ, უწინ პიკის საათში მოცდის საშუალო დრო  5-6 წუთს წარმოადგენდა. აღნიშნული დაყვანილია 2,5 – 3 წუთამდე, მომავალში კი მისი შემცირება ვაგონთა შემადგენლობების დამატების ხარჯზე 1,5 – 2 წუთამდეა დაგეგმილი.

ასევე მნიშვნელოვანია ახალი სადგურის „უნივერსიტეტის“ გახსნა, რომელიც ემსახურება როგორც ადგილობრივებს, ასევე თსუ-ს „მაღლივისა“ და „განივის“ სტუდენტებს.

 

 

ახალი ეკიპაჟები

აღსანიშნავია თბილისში გამოჩენილი ახალი სამარშრუტო ეკიპაჟებიც. მხედველობაში მაქვს როგორც ავტობუსები, ასევე მწვანე მიკროავტობუსებიც. სამწუხაროდ, იქიდან გამომდინარე, რომ ჯერ არ მომცემია საშუალება მემგზავრა აღნიშნულით, არ ვიცი რა უპირატესობა აქვს ამ მწვანე კონვეიერს მის წინამორბედთან, „ყვითელ მარშუტკასთან“ შედარებით. აღნიშნულის შესახებ, სიამოვნებით მივიღებ თქვენს შთაბეჭდილებებს კომენტარების სახით.

აქამდე 1400-1500 ყვითელი სამარშრუტო ემსახურებოდა თბილისს, ახლა კი შესაძლოა მათი რიცხვი შემცირდეს იმის ხარჯზე, რომ ახალი „მარშუტკები“ უფრო ტევადია დიდი გაბარიტებიდან გამომდინარე.

 

ჭავჭავაძის გამზირი

ამ ადგილის სრული რეაბილიტაციისა და დიდი ინვესტირების შემდეგ, საზოგადოების ნაწილი ვერ მალავს უკმაყოფილებას. აღნიშნულ ქუჩაზე დარჩენილია მხოლოდ ერთი სამოძრაო ზოლი თითო მიმართულებისთვის, დანარჩენი სივრცე კი გადანაწილებულია საზოგადოებრივი ტრანსპორტის ზოლებზე, გამწვანებაზე, ტროტუარსა და ველობილიკებზე.

საკრებულოს წევრის, ბატონი შალვა ოგბაიძის განცხადებით გამზირზე ერთი ზოლის დატოვება ატარებს ჭავჭავაძისთვის სატრანზიტო ფუნქციის ჩამოშორების იდეას. მძღოლები გადავლენ სხვა შემოვლით გზებზე, გამზირით კი ისარგებლებს მხოლოდ ის, ვისაც კონკრეტულად ჭავჭავაზეძე აქვს საქმე. აღსანიშნავია პარალელური ფალიაშვილისა და ბარნოვის ქუჩებიც, რომლებიც ადგილობრივებს მოემსახურება.

ქუჩის შუაში დაყენებული სამარშრუტო გაჩერებები და პირიქით, მოძრაობის საპირისპიროდ მოძრავი სამარშრუტო ნაკადები ინოვაციაა თბილისისთვის და უზრუნველყოფს საზოგადოებრივი ტრანსპორტის შეუფერხებელ გადაადგილებას.

კვლევებმა აჩვენეს, რომ ცვლილებების შემდეგ პიკის საათში საზოგადოებრივი ტრანსპორტით 2,5-ჯერ უფრო სწრაფადაა შესაძლებელი ს გამზირის ერთი ბოლოდან მეორეში მოხვედრა, ვიდრე ეს პირადი ავტომობილით.

ასევე, ყურადღებას იმსახურებს სიახლე სანაგვე ურნების სისტემაშიც. დამონტაჟებულია მიწისქვეშა დიდი სანაგვე საცავები, რომელიც გამოირჩევა დიდი ტევადობით. აღნიშნული იძლევა იმის საშუალებას, რომ ნაგვის გატანა მოხდეს გაცილებით უფრო იშვიათად. ნაგვის მანქანების არარსებობა პირდაპირ ზრდის გამზირის გამტარუნარიანობას.


 

ბოლოს, გიტოვებთ ვიდეოს ძალიან საინტერესო ექსპერიმენტის შესახებ.

 

emsi
up